ഗൾഫ് മേഖലയിലെ ഏറ്റവും വലിയ അതിർത്തി കടന്നുള്ള ഗതാഗത ശൃംഖലയായ യുഎഇ-ഒമാൻ റെയിൽ പദ്ധതി നിർണായകമായ ട്രാക്ക്-ലേയിംഗ് അഥവാ പാത നിർമ്മാണ ഘട്ടത്തിലേക്ക് കടന്നു. ഇത്തിഹാദ് റെയിൽ, ഒമാൻ റെയിൽ, മുബദല കമ്പനി എന്നിവയുടെ സംയുക്ത സംരംഭമായ ഹഫീത് റെയിൽ ആണ് ഈ പ്രധാന നാഴികക്കല്ല് പിന്നിട്ട വിവരം പുറത്തുവിട്ടത്. ഇരു രാജ്യങ്ങളും തമ്മിലുള്ള സാമ്പത്തിക-ലോജിസ്റ്റിക്സ് ബന്ധം ശക്തമാക്കുന്നതാണ് ഈ മെഗാ പ്രൊജക്റ്റ്.
ജബൽ ഹഫീതിന്റെ പേര് നൽകിയിരിക്കുന്ന ഈ റെയിൽവേ പദ്ധതി, യുഎഇയിലെയും ഒമാനിലെയും പ്രധാന വാണിജ്യ-വ്യാവസായിക കേന്ദ്രങ്ങളെ ബന്ധിപ്പിക്കുന്ന സംയോജിത ലോജിസ്റ്റിക്സ് ഇടനാഴിയായി മാറും. 238 കിലോമീറ്റർ ദൈർഘ്യമുള്ള ഈ ശൃംഖല അൽ ഐൻ, അൽ ബുറൈമി വഴി അബുദാബിയെ ഒമാനിലെ സോഹാർ തുറമുഖവുമായി നേരിട്ട് ബന്ധിപ്പിക്കും. മണിക്കൂറിൽ 200 കിലോമീറ്റർ വേഗതയിൽ സഞ്ചരിക്കുന്ന അത്യാധുനിക പാസഞ്ചർ ട്രെയിനുകളാണ് ഈ പാതയിൽ സർവീസ് നടത്തുക. ഇത് പ്രധാന നഗരങ്ങൾക്കിടയിലുള്ള യാത്രാ സമയം ഗണ്യമായി കുറയ്ക്കാൻ സഹായിക്കും.
കഴിഞ്ഞ ഏപ്രിൽ മാസത്തോടെ പദ്ധതിയുടെ 40 ശതമാനത്തിലധികം നിർമ്മാണ പ്രവർത്തനങ്ങളും പൂർത്തിയായിരുന്നു. സിവിൽ ജോലികളിലും പ്രധാന ഘടനകളിലും വലിയ പുരോഗതി കൈവരിച്ച പദ്ധതി, ഇതിനകം പത്ത് ദശലക്ഷത്തിലധികം സുരക്ഷിതമായ ജോലി സമയവും രേഖപ്പെടുത്തിയിട്ടുണ്ട്. ചരക്ക് സർവീസുകൾക്കായി റോഡ് ഗതാഗതത്തിന് പകരമായി കൂടുതൽ കാര്യക്ഷമവും സുസ്ഥിരവുമായ ബദൽ സംവിധാനമാണ് ഇതിലൂടെ ഒരുങ്ങുന്നത്. വിതരണ ശൃംഖല കൂടുതൽ ശക്തമാക്കുന്നതിനൊപ്പം ഗൾഫ്, ഏഷ്യ, ആഫ്രിക്കൻ വിപണികളെ ബന്ധിപ്പിക്കുന്ന പ്രധാന ലോജിസ്റ്റിക്സ് ഗേറ്റ്വേകളായി യുഎഇയെയും ഒമാനെയും മാറ്റാൻ ഈ ഹഫീത് റെയിൽ പദ്ധതിക്ക് സാധിക്കുമെന്നാണ് വിലയിരുത്തപ്പെടുന്നത്.
Content Highlights: The UAE-Oman Rail project has reached a significant milestone, bringing the Gulf's largest cross-border railway network closer to reality. The railway is expected to enhance transportation, strengthen economic ties, facilitate trade, and improve passenger and freight connectivity between the two neighboring countries.